Trosolwg o'r swydd

Mae’r rôl hon yn gyfle cyffrous i Endosgopydd Clinigol hyfforddedig ymuno â Thîm Endosgopi Bwrdd Iechyd Prifysgol Hywel Dda, gan weithio ar draws pedair uned endosgopi (y mae tair ohonynt wedi’u hachredu’n llawn gan y Grŵp Cynghori ar y Cyd).

Mae'r hysbyseb hon yn ceisio denu ymgeiswyr cymwys neu ymgeiswyr sydd â diddordeb mewn dechrau hyfforddi i fodloni'r cymhwyster a'r sgiliau ar gyfer rôl Band 8a. Bydd yr ymgwisydd llwyddiannus yn cael ei benodi o dan reolau Atodiad 21 Cymru Gyfan.

Mae hyn yn golygu y byddant yn cael eu cefnogi gan gynllun datblygu. (Yn ystod y flwyddyn gyntaf, bydd y taliad yn 65% o'r gyfradd cyflog uchaf ym Mand 8a, 70% yn ystod yr ail flwyddyn a 75% yn ystod y trydydd flwyddyn) ac ar ôl llwyddo i ennill y cymhwyster, bydd deiliad y swydd wedyn yn cael ei dalu ar Fand 8a (pwynt isaf y raddfa). Darperir cymorth a goruchwyliaeth er mwyn datblygu'r ymgeisydd llwyddiannus ar gyfer y rôl Band 8a. Gallai peidio â chyflawni'r cymhwyster a'r cymwyseddau gofynnol yn unol â'r amserlen ddynodedig arwain at adleoli. 

Fel rhan o broses Atodiad 21, nid oes cosb ariannol i’r rhai sy’n gwneud cais am y rôl hon lle bydd y ganran yn achosi gostyngiad mewn cyflog, ac o ganlyniad byddai amddiffyniad lleol yn cael ei roi ar waith nes bod y cyflog wedi dal i fyny.

Prif ddyletswyddau'r swydd

Ymgymryd ag hyfforddiant i:

• Cyflawni triniaethau endosgopi gastroberfeddol yn annibynnol. Mae'r triniaethau hyn yn gofyn am ardystiad arbennig a hyfforddiant arbenigol gan y Grŵp Cynghori ar y Cyd (JAG) ar Endosgopi, a byddant yn cael eu cynnal yn unol â safon Uwchymarferwyr Meddygol achrededig y Grŵp Cynghori ar y cyd.
• Gwneud diagnosis a thrin amrywiaeth o gyflyrau anfalaen a malaen yn annibynnol, a hynny'n aml yn rôl y prif glinigydd endosgopi ar y safle.
• Rheoli eich llwyth achosion eich hun o gleifion Gastroenteroleg yn annibynnol, gan ddarparu gwasanaeth diagnostig a therapiwtig ymreolaethol.
• Ymarfer ac amlygu lefelau arbenigol o farn glinigol, disgresiwn a gwneud penderfyniadau clinigol. Bod yn gyfrifol am wneud diagnosis o gyflyrau gastroberfeddol anfalaen a malaen, a thrafod canfyddiadau archwiliadau o'r fath â'r cleifion a chynllunio dulliau priodol o reoli cleifion.
• Cyflawni gwaith archwilio ac ymchwil a fydd yn gwella safonau gofal cleifion yn uniongyrchol ac yn cael effaith arnynt.
• Addysgu endosgopyddion dan hyfforddiant, a fydd yn cynnwys Endosgopyddion Clinigol eraill yn ogystal ag Uwch-feddygon Meddygol a Llawfeddygol (ar lefel Cofrestrydd a Meddyg Ymgynghorol).
• Darparu gwasanaethau addysgu ac addysg ar gyfer y gweithlu nyrsio endosgopi.
• Gweithio ar draws pedwar piler ymarfer uwch ac yn gallu amlygu hynny yn y maes ymarfer a chynnal portffolio o dystiolaeth.
• Gweithio tuag at gymhwyster Presgripsiynydd Anfeddygol annibynnol.

Gweithio i'n sefydliad

Mae Bwrdd Iechyd Prifysgol Hywel Dda yn darparu gwasanaethau gofal iechyd GIG i bobl sy’n byw yn Sir Gâr, Sir Benfro a Cheredigion, a siroedd sy’n ffinio.

Mae gennym dros 13,000 o staff a gyda’n gilydd rydym yn darparu gwasanaethau cynradd, cymuned, yn yr ysbyty, iechyd meddwl ac anghenion dysgu.

Gweithiwn mewn partneriaeth gyda’r tri awdurdod lleol, yn ogystal â chydweithwyr cyhoeddus, preifat a trydydd sector, a hefyd ein tîm o wirfoddolwyr gwerthfawr.

Darperir ein gwasanaethau yn:

• Pedwar prif ysbyty: Ysbyty Bronglais yn Aberystwyth; Ysbyty Glangwili yng Nghaerfyrddin; Ysbyty Tywysog Philip yn Llanelli; ac Ysbyty Llwynhelyg yn Hwlffordd 
• Pum ysbyty cymunedol: Ysbytai Dyffryn Aman a Llanymddyfri yn Sir Gâr; Ysbyty Tregaron yng Ngheredigion; ac Ysbytai Dinbych y Pysgod a De Sir Benfro yn Sir Benfro
• Dau ganolfan gofal integredig: Aberaeron ac Aberteifi yng Ngheredigion; a nifer o safleoedd cymunedol arall
• 47 o bractisiau cyffredinol (chwech ohonynt a rheolir gan y Bwrdd Iechyd); practisau deintyddol (gan gynnwys pedwar orthodontig); 99 o fferyllfeydd cymunedol; 43 o bractisau offthalmig cyffredinol; ac 8 o ddarparwyr offthalmig cartref
• Lleoliadau niferus yn darparu gwasanaethau iechyd meddwl ac anableddau dysgu