Trosolwg o'r swydd

Mae cyfle wedi dod ar gael i ymgeisydd addas sydd â phrofiad rheoli sylweddol weithio fel Uwch-brif Nyrs yn Uned Llygaid Tysul yn Ysbyty Glangwili. Bydd gan yr ymgeisydd delfrydol brofiad o weithio mewn uned Offthalmoleg hefyd, er y gellir darparu hyfforddiant os na ellir bodloni'r safon hon.

Mae Uned Llygaid Tysul yn cynnig amgylchedd gwaith unigryw gyda chymysgedd o dderbyn cleifion Achosion Dydd a rhyddhau cleifion Offthalmoleg, clinigau llygaid brys, clinigau laser a chlinigau ar gyfer pigiadau i'r llygaid, gan wneud hyn yn gyfle gwych ar gyfer dysgu a datblygu. Mae'r uned hefyd yn cwmpasu gweithgarwch ar safleoedd gwahanol, felly gellir disgwyl teithio achlysurol.

Arddel atebolrwydd am reoli'r adran, gan gynnwys arwain a datblygu'r sefydliad nyrsio craidd wrth ddarparu gofal nyrsio tosturiol, effeithiol, o'r radd flaenaf, sy'n canolbwyntio ar y claf; a rheoli pobl mewn modd teg, gonest ac ystyriol.

Darparu arweinyddiaeth, cymorth, goruchwyliaeth ac arweiniad nyrsio gweladwy a phroffesiynol, ynghyd â chyngor clinigol arbenigol, ac ymgymryd â gweithgareddau rheoli a monitro yn ôl gofynion cyfreithiol a phroffesiynol, rheolau statudol a pholisïau'r Bwrdd Iechyd sy'n ymwneud ag ymarfer seiliedig ar dystiolaeth.

Prif ddyletswyddau'r swydd

Gweithio'n annibynnol i gynllunio eich amserlenni gwaith eich hun, gan ystyried eich cyfrifoldebau rheoli dyddiol ac wythnosol, ynghyd â'r agweddau arwain a goruchwylio ar y rôl.

Goruchwylio gwaith proffesiynol a chlinigol y staff nyrsio yn y maes clinigol, gan ddyrannu gwaith yn effeithiol yn seiliedig ar sgiliau a gallu'r staff a gofynion y cleifion, a dirprwyo'r gwaith o ddarparu gofal lle y bo'n briodol, yn unol â fframwaith dirprwyo GIG Cymru, gan sicrhau bod staff yn defnyddio arfer sy'n seiliedig ar dystiolaeth.

Cefnogi staff i gynnal y safonau yng Nghod y Cyngor Nyrsio a Bydwreigiaeth (2018), a hynny'n rhan o'r broses o ddarparu gofal diogel o'r ansawdd a ddisgwylir gan ddefnyddwyr gwasanaethau a rheoleiddwyr.

Cymryd cyfrifoldeb am amserlennu staff yn effeithiol, er mwyn sicrhau bod gan y ward lefelau sgiliau a staffio effeithiol i ateb y galw; a bod iechyd a lles y staff yn ystyriaeth allweddol sy'n sylfaen i'r amserlenni a lunnir. 

Cymryd cyfrifoldeb dros gaffael a chynnal asedau ffisegol a chyflenwadau 
arbenigol ar gyfer y ward, gan sicrhau costeffeithiolrwydd, e.e. cwblhau ceisiadau cyfalaf, ceisiadau i gronfeydd elusennol.

Cynnal, monitro a gwerthuso safonau, gan sicrhau bod gofal o ansawdd sy'n seiliedig ar dystiolaeth yn cael ei ddarparu gan y tîm clinigol, a herio gyda pharch/chymryd camau priodol pan fo'r safonau gofal yn is na'r hyn sy'n ddisgwyliedig. 

Cyfweliadau i'w cynnal ar 17/07/25

Gweithio i'n sefydliad

Bwrdd Iechyd Prifysgol Hywel Dda yw cynllunydd a darparwr gwasanaethau gofal iechyd y GIG i bobl yn Sir Gaerfyrddin, Ceredigion, Sir Benfro a’r siroedd cyfagos. Mae ein 12,000 o staff yn darparu gwasanaethau sylfaenol, cymunedol, mewn ysbytai, iechyd meddwl ac anableddau dysgu i bron 400,000 o bobl ar draws chwarter ehangdir Cymru. Gwnawn hyn mewn partneriaeth a’n 3 awdurdod lleol a chydweithwyr yn y sector cyhoeddus, y sector preifat a’r trydydd sector, gan gynnwys ein gwirfoddolwyr, drwy:

4 prif ysbyty (Bronglais, Aberystwyth, Glangwili, Caerfyrddin, Tywysog Philip, Llanelli, ac Llwynhelyg, Hwlffordd).

5 ysbyty cymunedol (Ysbyty Dyffryn Aman ac Ysbyty Llanymddyfri yn Sir Gaerfyrddin, Ysbyty Tregaron yng Ngheredigion,Ysbyty Dinbych-y-pysgod a Chanolfan Adnoddau Iechyd a Gofal Cymdeithasol De Sir Benfro yn Sir Benfro.

Dwy ganolfan gofal integredig (Aberaeron ac Aberteifi, yng Ngheredigion).

Cyfleusterau cymunedol, gan gynnwys:

48 Meddygfa, 49 Deintyddfa, 98 Fferyllfa Gymunedol, 44 Practis Offthalmig Cyffredinol (gan gynnwys gwasanaethau iechyd llygaid a golwg gwan), 38 safle yn darparu gwasanaethau iechyd meddwl ac anableddau dysgu, gofal o fewn eich cartrefi eich hun

Gwasanaethau tra arbenigol a thrydyddol a gomisiynir gan Bwyllgor Gwasanaethau Iechyd Arbenigol Cymru, cydbwyllgor sy'n cynrychioli 7 bwrdd iechyd ledled Cymru.